7.1. Каляндарнае планаванне
У дзейнасці настаўніка вялікае месца займае распрацоўка планаў работы. Каб бачыць перспектыву ў навучанні, выхаванні і развіцці школьнікаў, настаўніку патрэбна сістэматызаваць сваю дзейнасць. У педагагічнай дзейнасці настаўніку можна і нават трэба абапірацца на планы метадыстаў і лепшых настаўнікаў, якія дзеляцца сваім вопытам у друку. Разам з тым неабходна мець на ўвазе, што педагагічная праца належыць да творчых відаў дзейнасці, што яна не церпіць шаблону, трафарэтнасці, аднастайнасці. Карыстаючыся апублікаванымі, а таксама сваімі планамі, распрацаванымі ў папярэднія гады, патрэбна іх абнаўляць з улікам асаблівасцей вучнёўскага калектыву, новых дасягненняў літаратуразнаўства і методыкі выкладання беларускай літаратуры, а таксама ўласнага вопыту.
Настаўніку ў працэсе працы даводзіцца звяртацца да каляндарнага, перспектыўнага і бягучага (паўрочнага) планавання.
Прыступаючы да каляндарнага планавання, спачатку неабходна выпісаць з вучэбнага плана пэўнага класа колькасць урокаў на тыдзень. Затым неабходна з вучэбнага плана выпісаць каляндарныя тэрміны вучэбных чвэрцей і падлічыць іх працягласць (карыстаючыся календаром) у тыднях. Пасля гэтага падлічваецца колькасць урокаў літаратуры на кожную чвэрць і вызначаецца, колькі з іх трэба адвесці на вывучэнне твораў, на ўрокі пазакласнага чытання і ўрокі развіцця мовы. Кіравацца пры гэтым трэба патрабаваннямі праграмы.
Каляндарныя планы бываюць двух відаў: простыя, разгорнутыя.
Пры простым каляндарным планаванні настаўнік складае план па наступнай форме:
№№ п.п. |
Назва тэмы |
Колькасць гадзін (але не больш, чым 2) |
Дата |
|
|
|
|
Для забеспячэння сістэмнасці ў навучанні, фарміраванні навыкаў і ўменняў па тэорыі літаратуры, выразным чытанні і развіцці мовы мэтазгодна складаць разгорнуты каляндарны план па наступнай форме:
№№ п.п. |
Назва тэмы |
Колькасць гадзін |
Дата |
Развіццё маўлення |
Тэорыя літаратуры |
Паўтарэнне |
Нагляднасць |
|
|
|
|
|
|
|
|
Па жаданні настаўнік можа павялічваць колькасць граф, напрыклад, уключыць міжпрадметныя сувязі.
Дата прастаўляецца алоўкам, у сувязі з магчымымі зменамі школьнага раскладу.
Каляндарны план складаецца, як правіла, на паўгоддзе і на цэлы навучальны год.