3.4. Школьныя праграмы па беларускай літаратуры
Вучэбная праграма па беларускай літаратуры вызначае змест і структуру школьнага курса беларускай літаратуры. Праграма складаецца з наступных раздзелаў: тлумачальнай запіскі, праграмы для 4—11 класаў, асноўных патрабаванняў да ведаў, уменняў і літаратурнага развіцця вучняў.
У тлумачальнай запісцы вызначаецца месца літаратуры сярод іншых прадметаў, акрэсліваюцца мэты і задачы яе выкладання, характарызуецца змест і структура літаратурнай адукацыі, тлумачыцца структура самой праграмы, вызначаюцца асноўныя метады і прыёмы працы, паказваюцца асаблівасці кожнага этапа выкладання літаратуры, падаюцца патрабаванні да развіцця мовы і да пазакласнай працы.
Асаблівасці пабудовы праграмы:
1) паказана размеркаванне матэрыялу для вывучэння з указаннем гадзін;
2) указаны творы мастацкай літаратуры і артыкулы з асноўнымі патрабаваннямі;
3) названы элементы тэорыі літаратуры для засваення;
4) матэрыял пададзены ў залежнасці ад прынцыпу пабудовы праграмы (жанрава-тэматычны, храналагічна-тэматычны, гісторыка-храналагічны);
5) пералічаны рэкамендацыйныя патрабаванні да ведаў, уменняў і навыкаў вучняў;
6) змешчаны спісы літаратуры для самастойнага прачытання і завучвання на памяць;
7) указаны колькасны паказчык гадзін на вывучэнне твораў, на ўрокі развіцця мовы, на пазакласнае чытанне.
Заданні для абмеркавання на практычных занятках
1. Заканспектуйце асноўныя этапы літаратурнай адукацыі, змест і структуры літаратурнай адукацыі ў Рэспубліцы Беларусь (Методыка выкладання беларускай літаратуры, С. 66—73).
2. Вызначце, наколькі эфектыўна рэалізацыя праграмы можа садзейнічаць літаратурнай адукацыі вучняў. Пры выкананні гэтага задання можна выкарыстаць прыкладны алгарытм працы:
— прынцып размеркавання матэрыялу ў праграме,
— размеркаванне гадзін пры вывучэнні курса беларускай літаратуры,
— творы мастацкай літаратуры ў школьнай праграме (тры спісы),
— тэорыя літаратуры ў праграме,
— сістэма вусных і пісьмовых прац,
— міжпрадметныя сувязі,
— патрабаванні да ўменняў і навыкаў.
3. Параўнайце праграмы, створаныя Мінскім і Брэсцкім калектывамі аўтараў, папярэдне прарэцэнзаваўшы кожную з праграм.
4. Якая праграма, на вашу думку, найбольш поўна адлюстроўвае гістарычны літаратурны працэс, адпавядае ўзроставым асаблівасцям вучняў? Абгрунтуйце свае высновы.