§ 63. АСНОЎНЫЯ СПОСАБЫ ЎТВАРЭННЯ ДЗЕЯСЛОЎНЫХ ФОРМ PERFECTUM І SUPĪNUM
I. У большасці дзеясловаў I спражэння perfectum утвараецца шляхам далучэння да асновы інфекта -vi, а supīnum - далучэннем -tum
Напрыклад: paro, āre, para-vi, para-tum (скар. paro, āvi, ātum, āre).
Такі спосаб утварэння называецца правільным, таму пры скарачэнні асноўных форм у слоўніку ўказваецца толькі спражэнне дзеяслова, калі гэты спосаб утварэння ў дадзеным спражэнні пераважае.
Напрыклад: orno,1 = orno, āre, āvi, ātum.
II. У II спражэнні найбольш прадуктыўным з’яўляецца perfectum на -ui і supīnum на -tum (-itum), якія далучаюцца да кораня дзеяслова.
Напрыклад: habeo, ēre, hab-ui, hab-itum (скар. habeo, ēre, ui, itum); doceo, ēre, doc-ui, doc-tum (скар.doceo, ēre, ui, tum).
III. Дзеясловы III спражэння ўтвараюць perfectum і supīnum рознымі спосабамі, асноўныя з якіх мы разгледзім ніжэй.
- Пры ўтварэнні перфекта ў дзеясловаў з асновай інфекта на b, p, c, g, d, t пераважна далучаецца суфікс -s, пры гэтым адбываюцца некаторыя фанетычныя змены. Supīnum жа заканчваецца на -tum (-sum).
Напрыклад: scribo, ĕre, scrip-si, scrip-tum; rego, ĕre, rexi (< reg-si), rec-tum ; mitto, ĕre, misi (< missi < mitsi < mits-si < mitt-si), mis-sum.
- Некаторыя дзеясловы ўтвараюць perfectum шляхам рэдуплікацыі, пры якой паўтараецца пачатковы зычны з галосным першага складу або з e.
Напрыклад: curro, ĕre, cu-curri, cursum; cado, ĕre, ce-cidi (< cecădi), casum.
- Perfectum можа ўтварацца і шляхам колькаснага змянення каранёвай галоснай асновы інфекта.
Напрыклад: lego, ĕre, lēgi, lectum. Часцей сустракаецца якаснае і колькаснае змяненне адначасова: făcio, ĕre, fēci, factum.
- У некаторых дзеясловаў асновы інфекта і перфекта могуць супадаць.
Напрыклад: constitu-o, ĕre, constitu-i, constitūtum; defend-o, ĕre, defend-i, defensum.
IV. Дзеясловы IV спражэння ўтвараюць часцей за ўсё асноўныя формы, як і дзеясловы I спражэння, правільным спосабам, напрыклад: finio,4 - finio, īre, finī-vi, finī-tum.
Аднак некаторыя дзеясловы ўтвараюць асноўныя формы спосабамі, нехарактэрнымі для дадзенага спражэння. Напрыклад:
I |
do, dare, dedi, datum; veto, āre, vetui, vetitum; |
II |
deleo, ēre, delēvi, delētum; mordeo, ēre, momordi, morsum; maneo, ēre, mansi, mansum; video, ēre, vidi, visum; |
III |
colo, ĕre, colui, cultum; cupio, ĕre,cupīvi, cupītum; |
IV |
aperio, īre, aperui, apertum; sentio, īre, sensi, sensum; venio, īre, vēni, ventum. |