7.4. Тэхналагічная карта ўрока беларускай літаратуры

 

Тэхналагічная карта ўрока ствараецца ў тых выпадках, калі настаўнік рыхтуе адкрыты ці конкурсны ўрок, дзеліцца вопытам, рыхтуе творчую справаздачу. Робіцца гэта з мэтай даць магчымасць больш эфектыўна ўбачыць і прааналізаваць кожны этап урока, а таксама дзейнасць на гэтым этапе як настаўніка, так і вучняў, яе прадуктыўнасць і мэтазгоднасць, прадугледзець выкарыстанне нагляднага матэрыялу. Тэхналагічная карта ўваходзіць у склад перспектыўнага планавання.

Узор прыкладнай тэхналагічнай карты:

 

Этапы ўрока	Дзейнасць вучняў	Дзейнасць настаўніка	Абсталяванне
І этап Арганізацыйны момант (прыкладна 1-2 хв.)	Псіхалагічная настроенасць	Мэтавая ўстаноўка	Адпаведнае тэме
ІІ этап Праверка хатняга задання (прыкладна 6 хв.)	Вуснае выказванне, абгрунтаваныя адказы на пытанні, справаздачы па творчых заданнях.	Каардынацыя адказаў, карэкцыя і кантроль.	Адпаведнае тэме
ІІІ этап Работа па тэме ўрока (да 30 хв.)	Формы, метады і прыёмы працы ў адпаведнасці са зместам новага матэрыялу.	Каардынацыя дзейнасці па засваенні новага матэрыялу.	Адпаведнае тэме
ІУ этап Падвядзенне вынікаў урока (прыкладна 3 хв.)	Лагічнае абагульненне і асэнсаванне матэрыялу.	Сістэматызацыя, карэкцыя і ўдакладненне.	Адпаведнае тэме
У этап Хатняе заданне (да 4 хв.)	Усведамленне заданняў.	Задаванне і тлумачэнне работы на дом.	Адпаведнае тэме

 

Заданні для абмеркавання на практычных занятках

1. Раскрыць сутнасць кожнага з відаў планаў. У чым асаблівасці кожнага з іх?

2. Распрацаваць:

- рэкамендацыі «Падрыхтоўка настаўніка да складання рабочага плана»;

- прыкладны каляндарны план на 1 паўгоддзе па беларускай літаратуры для 5—9 класаў (на выбар);

- перспектыўна-тэматычны  план вывучэння тэмы, разлічанай на 3 – 6 гадзін (на выбар).

3. Азнаёміцца з паўрочнымі планамі, змешчанымі ў часопісах «Роднае слова», «Беларуская мова і літаратура ў школе».

 

Спіс літаратуры

1. Гардзей, Н.М. Прыкладнае планаванне ўрокаў беларускай мовы і літаратуры ў 9 класе агульнаадукацыйнай школы з рускай мовай навучання // Н.М. Гардзей, В.В. Кушнярэвіч, Л.П. Лазарчык,  П.Л. Навіцкі, С.М. Тамашэвіч / – Мінск, 2002.
2. Жуковіч, М.В. Сістэма ўрокаў па вывучэнні аповесці Янкі Маўра “Палескія рабінзоны” ў УІІ класе / М.В. Жуковіч // Беларуская мова і літаратура – 2006. – № 3.
3. Захарка, Н.В. Якуб Колас. “На ростанях” (план-канспект урока) / Н.В. Захарка // Беларуская мова і літаратура. – 2003. – № 6.
4. Кушнярэвіч, В.В. Прыкладнае планаванне ўрокаў беларускай мовы і літаратуры ў 8 класе агульнаадукацыйнай школы з рускай мовай навучання / В.В. Кушнярэвіч, Л.П. Лазарчык, Т.І. Тамашэвіч. – Мінск, 2002.
5. Ляшук, В.Я. Планаванне вучэбнай работы настаўніка літаратуры / Ляшук В.Я. Лабараторныя заняткі па методыцы выкладання беларускай літаратуры. – Мінск. – 1988. – С. 59 – 76.
6. Міхайлаў, М.Р. Планаванне работы настаўніка літаратуры / Міхайлаў М.Р. Практыкум па методыцы выкладання беларускай літаратуры. – Мінск. – 1987. – С. 24 – 28.